اسمي بوجمعة تاجر – دكان بقالة – عزيز عليا نشوف الجديد في القنوات التلفزية , واحد نهار كنت تنقلب في الباربور وخرج ليا الاخ رشيد بقناة الحياة , وقع لي شوك ماعجبني كلامو , انا مسلم وهاد المسخوط تيقول كلام ديال المسخيط وتيشوفوه غير لمساخيط , دازت ايام وانا تنقول ضروري خصني نشوف اش باقي ايقول داك المسخوط , لعجب كل مرة تنقول ماخصنيش نتفرج فيها , وانا ديما تنرجع تنفرج على هاد القنوات المسيحية , وديما نسمع خصك تقرأ الانجيل كلام الحق ديال الله لي تيغير .
الرب يسوع المسيح كان تيدق عليا وباغيني نكون معاه , الكتاب المقدس انا حصلت عليه غير بقدرة الله , كان واحد الكراي ساكن عند عمي مشا بحالو وخلى لبكاج ديالو كان عندو بزاف الكتب الاسلامية ومن بين هاد الكتب كان كتاب الحياة , ماعرفتوش في الاول لكن لما بدت تنقراه عرفت بلي هو كتاب الانجيل , طرفتو على جنب , عامين ماوصلت ليه ولاقربت ليه , حتى هادي اربعة اشهر رجعت للانجيل وبديت تنقراه , بعدما تقرر وبان لي الحق والفرق مابين التعاليم ديال الاسلام محمد وتعاليم ديال المسيح , تاكد لي الحق , راه الفرق تيبان وتنشوفو اش واقع في دنيا .
قبلت المسيح هو المخلص لحياة ديالي , ونهار لي صليت ليه صلاة ربانية باسم المسيح , حسيت بواحد لبرودية بحال لي غطستي شي واحد في ماء بارد في وقت البرد , حسيت براسي فرحان , ولي عندي معاه شي مشكلة تصلت به وطلبت منو المسامحة .
محبة المسيح ضربت ليا قلبي , وحياتي تغيرات كلها لما أمنت بالمسيح , كنت منفعل وديما متوثر ودبا تنشكر سيدي ربي ولى عندي سلام وديما فرحان وناشط .
