سميتي شفيق من دكالة اقليم الجديدة , عمري 35 سنة , غادي نعاود ليك من هدي ربعة ديال الاشهر , لما جاو عندي جوج ديال الاجانب من فرنسا لدار الوالدين تيسولو علي , قالو ليهم راه خدام و ماتيجي حتى لثمانية وتيجلس في قهوة ديال الحي
وانا جالس في المقهى تنفكر شكون هدوا لتيسولو علي و بالاسم الكامل ديالي لعجب , لما وصلت ثمانية ديال لعشية , تيبان لي جوج ديال الاجانب واقفين قبالة لمقهى واحد في الخمسينات من العمر و الاخر في الاربعينات , جمعت لوقفة ومشيت لعندهم عرفتهم علاش جاو ولاش جاو وشكون هما , من شوفة الاولى قلبي خبرني بكلشي وعطني سلام اتجاهم
طلبو مني البطاقة الوطنية باش اتاكدو من هويتي , وركبوا معيا في سيارة ديال العمل ومشينا لموضع بعيد على عيون ناس , قالو لي انهم حصلو على عنوان ديالي من ابو بطرس , صلوا معي وعطاوني كتب وسيدي ديفيدي ومطويات كلها باللغة الفرنسية , وصلتهم الفندق وخبروني انهم غيعاودو اتصلو بي مرة اخرى
بكل صدق انا مقدرتش نحافظ على هده الكتب وسيدي ديفيدي ومطويات مزقتهم وفرقتهم على سلة ديال مهملات هنا وليه , لما وصلت لدار استرجعت ايام زمان 12 سنة هدي , لما كنت مع صحابي على شاطئ تنلعبو كرة , شفت واحد الكاوري في السن ديالي مفركس ولابس بيسات واعرين , مشيت لعندو وطلبتو وقلت ليه بغيت لحويج معنديش مانلبس , الولدين مجرين علي من الدار , خادني مسكين لدارو وعطاني لحويج ديالو ولفلوس مزال
بقاى فيا الحال بزاف , حيث انا كدبة عليه وهو صدقني وتعامل معايا زوين , محملتش راسي نوقف هدا الموقف , ولكن جاكيط ديال لعسكر لي كان لبسها خلتني نكدب ونطمع فيها , مرت لايام قليلة وانا نتصادف مع نفس الاجنبي طلبت منو سماحة , وشرحت ليه الموقف ديالي , تقبل مني الاعتدار وقال لي كان عليك تقول لي صدق وانا نعطيك بلا ما تكدب ولكن انا مسامحك وبصحة لحويج جداد
هدا الموقف لي وقع لي مع لكاوري خلني نسقسي اشنو هو الفرق ما بين المسلمين و النصارى , وكانت قناة سات سبعة هي لمفتاح لبداية الجواب , تفرجت في فيلم السيد المسيح وفي عديد من البرامج دياولها , ونقلت واحد العنوان على القناة من فرنسا , راسلتهم بالمراسلة العادية , وكانوا تيرسلو لي دروس وسيديات , واحد نهار توصلت برسالة مكتوبة بالخط اليد وفيها رقم لهاتف داخل المغرب , تتحدد لي موعد ومكان اللقاء , والغريب انها مرسلة من ازمور و باسم ابو بطرس , خفت ودخلني شك خصوصا لما اتصلت بالرقم مرتين بلا مجيب , مزقة الرسالة وعشت حياتي بطولها وعرضها وعلى قلبي سيدي ربي يسوع المسيح , لكل مرة تنتفكرو وتندعي ونصلي لسيدي ربي , لي كان كل مرة تيرسل لي اشارات قوية في احلام ومرة مع صحابي , ويقول لي راك ماشي بوحدك راه انا معاك ومغاديش نسيبك
وهدا مكان ,كنت تنعرف واحد المغربي تيشتغل مرشد لسياح هو متزوج باجنبية كنت تكلمت معه في موضوع المسيحية و شرح لي بعض الامور ونصحني بالاستماع لراديو راه تتوجد بها اداعات مسيحية , وبحكم طبيعة عمله كان ديما مشغول و هو دابا راه خارج المغرب … واحد نهار من ايام الله كنت لاعب مع صحابي الكرة وكان معنا واحد الولد ديما تيحلف بحق سيدنا عيسى , دخلني شك والخوف , تشجعت وسولتو وقلت ليه علاش تتحلف باسم سيدنا عيسى, قال لي حيث هو الله لحقيقي وضحك وزاد وماعودش جبد معايا لكلام
كما قلت ليكم الله قال لي راك ماشي بوحديتك راه انا معاك ومغاديش نسيبك ….وهدا ماكان جوج ديال الاجانب جاو اسولو علي بعد 12 سنة من انقطاع المراسلة….. وراه انا دابا مابين خوتي لمغاربة تنتعلم وتنسمع ونستمتع بسيدي ربي , و راه جا لي في منام ونوضني من لفراش وخرجني من بيت كل ظلمة وقال لي تبعني حيث كين نور قبالتك , وهدي هي حكايتي مع سيدي كيف اختارني وجابني لعندو , تنطلب منكم تصلو من اجلي باش الرب ينزع الخوف من قلبي ونشهد بعمل الرب في حياتي , ومحبته لينا جميع
