أمـثـال الـمـسـيـح

أمـــثــال الــمـــســيــح : مثل الكنز المُخفى ومثل اللؤلؤة كثيرة الثمن

مرحبا بك صديقي المستمع في هدا اللقاء الجديد من برنامج امثال المسيح , حلقة اليوم  مثال الكنز المُخفى ومثال اللؤلؤة الكثيرة الثمن, من خلال هدا المثل غادي نبينو ونكشفو حقائق روحية باغينا السيد المسيح  نعرفوها .

تيقولو النهار المزيان من صباحه يبان , وكل واحد وزهره , واللي بغا الله يعطينا يثقب السما ويغنينا , ختي و خويا واش سبق ليك قيتي او جاك شي رزق ماشفوه عينين وماشدوه يدين ؟, جالس مابك ماعليك حتى قتيه قبالتك ؟ كيف كان او غادي يكون الرد الفعل ديالك ؟   تصور معايا كيف غادي تكون الحالة ديالك  وكيف غادي تصرف لما يجيك او تقى  شي رزق  , راه لي عطاك العطاي لاتفرش لاتواطي .

السيد المسيح صديقي المستمع تكلم على هاد الموقف لي ممكن يحصل ويوقع لينا في

مثل الكنز المُخفى ومثل اللؤلؤة الكثيرة الثمن , أنجيل متى الاصحاح 13 والعدد من 44 الى 46 وقال : وْكَتْشْبَهْ مَمْلَكَةْ السَّمَاوَاتْ عَاوْتَانِي لْوَاحْدْ الْكَنْزْ مْدْفُونْ فْوَاحْدْ الْفْدَّانْ لْقَاهْ وَاحْدْ الرَّاجْلْ وْعَاوْدْ دْفْنُه، وْمْنْ كْتْرَةْ الْفَرْحَة دْيَالُه مْشَى بَاعْ كُلّْ مَا كَيْمْلَكْ وْشْرَا دَاكْ الْفْدَّانْ. وْكَتْشْبَهْ مَمْلَكَةْ السَّمَاوَاتْ عَاوْتَانِي لْوَاحْدْ التَّاجْرْ كَانْ كَيْقَلّْبْ عْلَى الجُّوهْرْ الصَّافِي، وْمْلِّي لْقَا وَاحْدْ الجُّوهْرَة غَالْيَة بْزَّافْ، مْشَى بَاعْ كُلّْ مَا كَيْمْلَكْ وْشْرَاهَا

ختي وخويا السؤال لكبير لي بغينا نقاو ليه اجابة ,  واش مملكة السماء غالية حتى لهاد الحد ؟ وعلاش تنقولو ان مملكة السماء ثْروة عَظْيمة ؟ واش ممكن لاي شخص يحصل على هدا الثروة ويكون من المحظوظين كيفاش ادير ليها ؟

باش نجاوبو على هده الاسئلة خصنا نعرفوا بعد القيمة , واش المقصود بالمملكة السماوات ؟

اولا : مملكة السماوات تنقصدو بها  القبول السيد المسيح مخلص وغافر لكل خطاياك .

ثانيا : مملكة السماوات تنقصدو بها , التسليم حياتك لسيد المسيح كملك قادر باش يغير حياتك للافضل ويعطيك فرح حتى في الاوقات العصيبة .

ثالثا : مملكة السماوات تنقصدو بها , أن الحياة ماهي الا جسر فاني نحو الحياة الابدية والخالدة مع الله المحب .

صديقي المستمع مملكة السماوات . هي أعظم ثروة وكنز يمكن يحصل عليها الانسان , هي ثروة يستاهل الانسان يقدم ويضحي بكل نفيس وغالي باش يحصل عليها .

تيقول السيد المسيح في انجيل متى الاصحاح 16 والعدد 24-25 : وْهُوَ يْݣُولْ يَسُوعْ لْتْلَامْدُه: إِلَا بْغَا شِي وَاحْدْ يْتْبَعْنِي، خَاصُّه يْسْمَحْ فْرَاسُه وْيْهَزّْ الصّْلِيبْ دْيَالُه وْيْتْبَعْنِي، عْلَاحْقَّاشْ اللِّي بْغَا يْنَجِّي حْيَاتُه غَيْضَيّْعْهَا، وَلَكِنْ اللِّي ضَيّْعْ حْيَاتُه عْلَى قْبْلِي غَيْلْقَاهَا. آشْ مْنْ نْفَعْ عَنْدْ بْنَادْمْ إِلَا رْبَحْ الدّْنْيَا كُلّْهَا وْضَيّْعْ حْيَاتُه؟

صديقي المستمع , اليوم سمعتي على هدا الكنز , ممكن تحصل عليه إدا كنت من المحظوظين , فقط ندعوك باش تقبل المسيح في حياتك بالايمان بالموت ديالوا على الصليب وقيامتو من الاموات من أجلك باش يغفر خطاياك ويغير حياتك ويعطيك الحياة الابدية . هدا هو الكنز المخفي لي كشفناه ليك في هده الحلقة من امثال المسيح والقرار بيدك انت وحدك صديقي المستمع.

 

اظهر المزيد

مقالات ذات صلة

زر الذهاب إلى الأعلى
× كيف لي ان اساعدك ؟