هداك الانسان لتيتقال عليه انه ممزيانش وانه خارج طريق وغير صالح انا تنبغي نسمع ليه ونعرف مالو واش واقع ليه ونساعدو , سواء كان رجل او امراة , شاب او شابة , بل حتى الاطفال
تصرفي هدا غريب وشاد عند الكثير من الناس لي تنعرفهم بل حتى الاقرباء ديالى , ينظرون الى افكاري وطريقة حياتي بأنها غريبة ومختلفة
صحبات دياولي تيقول لي مكانك ماشي هنا انت عندك تفكير واسلوب في حياتك ديال نصارى , وهدا ماكان , انا ما نقدرش نعيش وسط ناس كلامهم ماهو افعالهم , ايمانهم مبني على التناقضات والتضاربات , مرة اقول دير هكدا ومرة اقول دير بحال هكدا , انا معرفتش واش انا على حق نعيش حياتي بلا دين ديال الوالدين و الاجداد , او نصلى صلاة المفروضة في اوقات محددة وحركات معينة وايات مكررة , دون ان تغير من حياتي وطباعي شئ
في فترة من حياتي كنت متمردة على الله نقولو كنت ملحدة , ولكن كنت كلما تيمر علي شي مشكل كبير الا وتنقا الله واقف معايا , هدا خلاني نثيق ان الله كين , ولكن واش الله ديال المسلمين ولا ديال نصارى هو لي على حق
النصارى انا تنعرفهم من خلال علاقات ديالى معهم صداقات وفي العمل , والمسلمين انا تنعيش وسطهم وانا مغربلاهم وعاجنهم وخابزاهم
بدات رحلتي في البحث عن المسيحية , نسول هدا الشخص ونسول هدا سيدة ونسول هدا الصديق , الكل تيقول لي , واش امكن نتكلموا في شي موضوع من غير هدا , و الاخر تيكون رد ديالو راه المسلم لتيولي نصارني راه مرتد والجزاء ديالو هو القتل , والكثير ممن سالتهم كان عندهم التباس وسوء فهم بخصوص الثالوث الاب و الابن وروح القدس , كل واحد تنقول ليه راه المسيح هو الله , تيرفض هدا الامر ويعارض اعود بالله من شيطان الرجيم , شخص واحد هو لي قال لي المسيحية راه محبة , كيفاش المسيحية محبة …..شكون امكن ليه اشرح لي هدا الامر , واش كين مغاربة مسيحين في المغرب , اكيد كين لا ماكينش , كنت كل مرة نطلب سيدي ربي اساعدني باش نقى او نتعرف على شخص اعرفني على هدا الدين المسيحي , ومرات الايام , وفي يوم من الايام قيت مابين اغراض ديال الاخ ديالي كتاب اخضر تفسيري للانجيل , اطلعت عليه لكن مافهمت والو وفهمت , زاد عندي اصرار على ان هده المسيحية راها فيها شي حاجة تتجدبني ليها , واحد نهار تكنكت على صفحات فيس بوك وقيت اشهار لموقع مسيحي مغربي تيعرض شهادة لمغربية مسيحية من تزنيت الاب ديالها استاد , دخلت لصفحتهم على الفيس بوك ومن بعد دخلت للموقع وبديت تنقرا الشهادات للمغاربة قبلو السيد المسيح , كانت صعوبة انا تنقرا الشهادات لانها كانت مكتوبة بخط غير واضح , اقفلت الموقع , ودهبت للفراش لنوم , بقيت اكثر من ثلاث ساعات وانا تنفكر في داك شي لقريتو , وتنقول خصني على الاقل ناخد رقم الهاتف ديال الموقع ونتصل بيهم , ضروري خصني نوض وناخد رقم الهاتف ديال الموقع , وهدا ماكان , فتحت جهاز كومبيوتر ودخلت لصفحة الفيس بوك التي وجدت فيها الاشهار ودخلت لصفحة الموقع على الفيس بوك ثم على الموقع حب المغرب , اتصلت بهم , فلم يجبني احد , لكن في الصباح اتصل بي شخص من الموقع واخبرني كيف يمكن ان يساعدني لنموي الروحي , كانت عندي اسئلة واستفسارات كثيرة , كيف انكون مسيحية , كيف نصلي , اش خصني ندير حتى نكون مسيحية , اشنو هي المسيحية
كانت ايام عصيبة تنمر فيها هدا الاسبوع مع العائلة – الدعوة تجمعات علي – كنت عصبية وفي حالة غير عادية , ماقيت على من حط راسي ونشكي ليه حالى , رفعت راسي لسما وشبكة ليدي وفتحت قلبي لسدي ربي , وبديت تناجي وندعي لربي العالي القدير , شتو اه شتو بعيني هدي شتو وهو تيبتسم لي , نسمة ريح , كلها حب وفرح ومحبة , جات من جيهتو , وانا فرحانة وسعيدة , كان وقت زوين قضيتو مع سيدي ربي , ونقول ليك ان هدا الامر تكرر معي اكثر من مرة , الله قريب خصنا فقط نفتحو ليه قلبنا , وانا بغيت نعرف اكثر عن السيد الرب يسوع المسيح , بغيت نعرف الرب اكثر , بغيتو هو اكون راضي علي ماشي ناس
