الْمْتَالْ دْيَالْ الرَّاجْلْ اللِّي كَيْزْرَعْ
الْمْتَالْ دْيَالْ الرَّاجْلْ اللِّي كَيْزْرَعْ

أمـــثــال الــمـــســيــح : الْمْتَالْ دْيَالْ الرَّاجْلْ اللِّي كَيْزْرَعْ

الْمْتَالْ دْيَالْ الرَّاجْلْ اللِّي كَيْزْرَعْ

مرحبا بك صديقي المستمع في هدا اللقاء الجديد من برنامج امثال المسيح , حلقة اليوم  الْمْتَالْ دْيَالْ الزَّارْعْ, من خلال هدا المثل غادي نبينو ونكشفو حقائق روحية باغينا السيد المسيح  نعرفوها .

وقبل من هاد شيء , بغيت نحكي ليكم واحد نكثة فيها معاني كثيرة : هاد واحد السيد كان مسافر على باطوا وهو يسول واحد لبحار خدام فوق الباطوا , قال ليه واش تتعرف شي حاجة في علم الفلك ؟ وهو يجاوبو وقال ليه إلا . قال له : ضاع منك ربع في لعمر ديالك . وهو يسولو للمرة الثانية : واش تتعرف شي حاجة في علم الجيولوجيا : جاوبو البحار وقال ليه إلا . قال ليه ضاع منك نصف في لعمر ديالك . سولو للمرة الثالثة : واش تتعرف شي حاجة في الفلسفة ؟ وهو يجاوبوا وقال ليه : إلا . قاله له : ضاع منك ثلاثة الارباع في لعمر ديالك . وشوية وهي تجي واحد العاصفة ديال ريح هيجت لمواج ولطمات سفينة وهجم الماء عليها من كل جهة , يارحيم الله  , ياللطيف الطف . وهو سيول البحار داك الرجل المسافر  لي بارك اسول فيه وقال ليه ؟ واش تتعرف تعوم في البحر ؟ وهو يجاوبو وقال ليه : إلا . رد عليه البحار بخو كلامو وقال ليه ضاع منك عمرك كلو

هده نكثة معروفة لكن فيها معاني كثيرة , خص كل واحد فينا يكون عقولو صغير قابل باش يتعلم ويسمع كل حاجة جديدة تتهمو , ماشي راسوا قاسح ورفيكس إن عكسنا . وصدقوا ناس لولين : قطرة فوق قطرة بحر وحكمة فوق حكمة علم

السيد المسيح تكلم على اصناف ديال هاد الناس في الْمْتَالْ دْيَالْ الزَّارْعْ ,  انجيل متى الاصحاح 13 والعدد 24 الى 30 , ومن 36 الى 43 .

الصنف الاول من البشر ماباغي يسمع ماباغي يفهم رسالة الخلاص قال عليه سيد المسيح : إِيوَا سْمْعُو نْتُمَ الْمَعْنَى دْ الْمْتَالْ دْيَالْ الرَّاجْلْ اللِّي كَيْزْرَعْ: اللِّي كَيْسْمَعْ الْكْلَامْ دْيَالْ مَمْلَكَةْ اللَّهْ وْمَا كَيْفَهْمُوشْ، كَيْجِي الشِّيطَانْ وْكَيْخْطَفْ دَاكْشِّي اللِّي تّْزْرَعْ فْقَلْبُه، وْهَادَا هُوَ اللِّي كَنْشَبّْهُه بْالزّْرَعْ اللِّي طَاحْ فْالطّْرِيقْ.

الصنف الثاني من البشر باغي غير ساهلة ومابغي يحفى وينشف ويدفع الثمن ويواجه الضيق قال عليه سيد المسيح : وْاللِّي تّْزْرَعْ فْالْأَرْضْ الْمْحَجّْرَة، هَادَا هُوَ اللِّي كَيْسْمَعْ كْلَامْ اللَّهْ وْكَيْقْبْلُه دْغْيَا بْالْفَرْحَة،  وَلَكِنْ كْلْمَةْ اللَّهْ مَا شَادَّاشْ مْزْيَانْ فْقَلْبُه، وْإِيمَانُه كَيْبْقَى غِيرْ وَقْتْ قْلِيلْ، وْمْلِّي كَيْوَقْعُو الْمَشَاكِيلْ وْالتَّعَدُّو، كَيْبَعّْدْ دْغْيَا عْلَى الْإِيمَانْ.

الصنف الثالث من البشر, الصباط طالوا والقراية والو نسى ان العلم خير من المال , واللي ترك العلم وانشغل بجمع المال حسبه من الجهال , هاد الصنف مثول السيد المسيح وقال عليه : وْاللِّي مْزْرُوعْ وَسْطْ الشُّوكْ، هُوَ اللِّي كَيْسْمَعْ كْلَامْ اللَّهْ وَلَكِنْ هَمّْ الدّْنْيَا وْمْحَبَّةْ الْفْلُوسْ كَيْخَنْقُو كْلَامْ اللَّهْ فِيهْ وْمَا كَيْعْطِي غْلَّة .

الصنف الرابع والاخير من البشر هو لتيتجاوب مع كلمة الله وعمل روح القدس والخبر السار وتيأمن به , مثلو السيد المسيح وقال عليه : أَمَّا هَادَاكْ اللِّي مْزْرُوعْ فْالْأَرْضْ الْمْزْيَانَة، هُوَ اللِّي كَيْسْمَعْ كْلَامْ اللَّهْ وْكَيْفَهْمُه وْهُوَ اللِّي كَيْعْطِي الْغْلَّة، بَعْضْ الْخَطْرَاتْ عْلَى مْيَةْ مَرَّة، وْبَعْضْ الْخَطْرَاتْ عْلَى سْتِّينْ، وْبَعْضْ الْخَطْرَاتْ عْلَى تْلَاتِينْ .

أختي وخويا عندي واحد سؤال واش تتعرف أن السيد المسيح هو المخلص و الايمان بالموت والصلب والقيامة ديالوا , به يتحقق الغفران الخطايا ديالنا ؟ ممكن انت تتعرف بزاف حاجات لكن راه لي ماكنتيش تتعرف أن المسيح هو المخلص , راك ماتتعرف والو وضاع عمرك كامل على هاد الارض وخسرتي مستقبلك الابدي , الموضوع مهم وتيمس الحياة ديالك ماتهاونش وتكاسل قلب على نسخة ديالك من الانجيل وقراه ولي ماعرفتيش شي حاجة دعي لسيدي ربي افهمك وسول خوتك .