اسئلة واجوبةالْإِنْجِيلْ بْالدَّارِجَة الْمَغْرِبِيَّة كِمَا رْوَاهْ يُوحَنَّا

الْإِنْجِيلْ بْالدَّارِجَة الْمَغْرِبِيَّة كِمَا رْوَاهْ يُوحَنَّا – الْفَصْلْ التَّانِي

يسعدنا أنك تود أن تكون لديك علاقة شخصية مع يسوع المسيح! . إذا كنت تريد معرفة المزيد حول كيفية اتباع يسوع من خلال التحدث إلينا والاجابة على تساؤلاتك لاتتردد ان تكتب لنا
WhatsApp: +212 642-833322

الْإِنْجِيلْ بْالدَّارِجَة الْمَغْرِبِيَّة كِمَا رْوَاهْ يُوحَنَّا – الْفَصْلْ التَّانِي

الْمُعْجِزَة اللّْوّْلَى اللِّي دَارْ الْمَسِيحْ
1 وْفْالنّْهَارْ التَّالْتْ، كَانْ وَاحْدْ الْعَرْسْ فْقَانَا اللِّي فْالْجَلِيلْ، وْكَانْتْ أُمّْ يَسُوعْ تْمَّ. 2 وْكَانْ يَسُوعْ وْتْلَامْدُه حْتَّى هُمَ مْعْرُوضِينْ لْلْعَرْسْ. 3 وْمْلِّي تّْسَالَا الْخْمَرْ لْمَّالِينْ الْعَرْسْ، ݣَالْتْ لِيهْ مُّه: «رَاهْ تّْسَالَا لِيهُمْ الْخْمَرْ!». 4 وْهُوَ يْݣُولْ لِيهَا يَسُوعْ: «آشْ بِينِي وْبِينْكْ آ هَادْ الْمْرَاة؟ رَاهْ سَاعْتِي مَازَالْ مَا جَاتْ». 5 وْݣَالْتْ مُّه لْلْخْدَّامَا: «اللِّي ݣَالْ لِيكُمْ عْلِيهْ، دِيرُوهْ!». 6 وْكَانُو تْمَّ سْتَّة دْيَالْ الْخْوَابِي مْصَايْبِينْ مْنْ الْحْجَرْ، كَيْسْتَعْمْلُوهُمْ لِيهُودْ بَاشْ يْتّْنْقَّاوْ، وْكَانْتْ كُلّْ خَابْيَة كَتْهَزّْ تْقْرِيبًا مَا بِينْ تْمَانِينْ حْتَّى لْمْيَة وْعْشْرِينْ يْتْرُو. 7 وْݣَالْ لِيهُمْ يَسُوعْ: «عَمّْرُو الْخْوَابِي بْالْمَا!»، وْهُمَ يْعَمّْرُوهُمْ حْتَّى لْلْفُمّْ. 8 وْمْنْ بَعْدْ ݣَالْ لِيهُمْ: «دَابَا، خْوِيوْ وْعْطِيوْ لْلِّي مْكَلّْفْ بْالْعَرْسْ». وْعْطَاوْهْ. 9 وْمْلِّي دَاقْ الْمَا اللِّي وْلَّى خْمَرْ، مَا عْرَفْشْ مْنِينْ جَا هَادْ الْخْمَرْ، وَلَكِنْ الْخْدَّامَا اللِّي فَرّْقُو مْنُّه كَانُو عَارْفِينْ. وْعَيّْطْ اللِّي مْكَلّْفْ بْالْعَرْسْ عْلَى الْعْرِيسْ، 10 وْݣَالْ لِيهْ: «ݣَاعْ النَّاسْ كَيْعْطِيوْ الْخْمَرْ الْمْخَيّْرْ فْاللّْوّْلْ، وْمْلِّي كَيْسَكْرُو الضّْيَافْ كَيْعْطِيوْهُمْ الْخْمَرْ الرّْخِيصْ، أَمَّا نْتَ رَاكْ خَلِّيتِي الْخْمَرْ الْمْزْيَانْ حْتَّى لْدَابَا!». 11 هَادِي هِيَ الْعَلَامَة اللّْوّْلَى اللِّي دَارْهَا يَسُوعْ فْقَانَا اللِّي فْالْجَلِيلْ، وْبَيّْنْ الْعَزّْ دْيَالُه وْآمْنُو بِيهْ تْلَامْدُه. 12 وْمْنْ بَعْدْ هَادْشِّي نْزَلْ لْكَفْرْنَاحُومْ، هُوَ وْمُّه وْخُوتُه وْتْلَامْدُه، وْبْقَاوْ تْمَّ شِي يَّامَاتْ قْلَالْ.*
يَسُوعْ كَيْمْشِي لْأُورْشَلِيمْ
13 وْكَانْ عِيدْ الْفِصْحْ دْيَالْ لِيهُودْ قْرِيبْ، وْطْلَعْ يَسُوعْ لْأُورْشَلِيمْ. 14 وْلْقَا فْبِيتْ اللَّهْ الْبْيَّاعَا دْ الْبْݣَرْ وْالْغْنَمْ وْالْحْمَامْ، وْاللِّي كَيْصَرّْفُو الْفْلُوسْ ݣَالْسِينْ. 15 وْهُوَ يْصَايْبْ مْصْوِيطَة مْنْ الْحْبَالْ وْجْرَّى عْلِيهُمْ كُلّْهُمْ مْنْ بِيتْ اللَّهْ مْعَ الْغْنَمْ وْالْبْݣَرْ دْيَالْهُمْ، وْشَتّْتْ الدّْرَاهْمْ دْيَالْ اللِّي كَيْصَرّْفُو الْفْلُوسْ وْقْلَبْ طْبَالِيهُمْ. 16 وْݣَالْ لْلْبِيَّاعَا دْ الْحْمَامْ: «خَرّْجُو هَادْشِّي مْنْ هْنَا، مَا تْرَدُّوشْ دَارْ بَّا دَارْ لْلْبِيعْ وْالشّْرَا!». 17 وْتّْفَكّْرُو تْلَامْدُه بْلِّي مْكْتُوبْ فْكْتَابْ اللَّهْ: «الْغِيرَة عْلَى دَارْكْ غَادِي تَاكْلْنِي». 18 وْسْوّْلُوهْ لِيهُودْ: «آشْ مْنْ عَلَامَة غَتْدِيرْ بَاشْ تْوَرِّينَا بْلِّي عَنْدْكْ الْحَقّْ تْدِيرْ هَادْشِّي؟». 19 وْجَاوْبْهُمْ يَسُوعْ وْݣَالْ: «رَيّْبُو هَادْ بِيتْ اللَّهْ، وْفْتْلْتْ يَّامْ أَنَا غَنْبْنِيهْ».* 20 وْهُمَ يْݣُولُو لِيهْ لِيهُودْ: «هَادْ بِيتْ اللَّهْ تّْبْنَى فْسْتَّة وْرْبْعِينْ عَامْ، وْنْتَ فْتْلْتْ يَّامْ غَتْعَاوْدْ تْبْنِيهْ؟». 21 وَلَكِنْ يَسُوعْ كَانْ كَيْقْصَدْ بْلِّي بِيتْ اللَّهْ هُوَ الدَّاتْ دْيَالُه. 22 وْمْلِّي تّْبْعَتْ مْنْ الْمُوتْ، تّْفَكّْرُو تْلَامْدُه بْلِّي ݣَالْ هَادْشِّي، وْآمْنُو بْكْتَابْ اللَّهْ وْالْكْلَامْ اللِّي ݣَالُه يَسُوعْ.
23 وْمْلِّي كَانْ يَسُوعْ فْأُورْشَلِيمْ فْعِيدْ الْفِصْحْ، آمْنُو بْزَّافْ دْ النَّاسْ بْالْإِسْمْ دْيَالُه حِيتْ شَافُو الْعَلَامَاتْ اللِّي دَارْ. 24 وَلَكِنْ يَسُوعْ مَا كَانْشْ كَيْتِيقْ فِيهُمْ، عْلَاحْقَّاشْ كَانْ كَيْعْرَفْ النَّاسْ كُلّْهُمْ. 25 وْمَا كَانْشْ مْحْتَاجْ لْشِي وَاحْدْ يْشْهَدْ لِيهْ عْلَى بْنَادْمْ، حِيتْ كَانْ كَيْعْرَفْ أَشْنُو كَايْنْ فْقَلْبْ بْنَادْمْ.

اظهر المزيد

مقالات ذات صلة

زر الذهاب إلى الأعلى
× كيف لي ان اساعدك ؟